Crypteroniaceae

Ti Crypteroniaceae ket ti pamilia dagiti agsabsabong a kayo ken dagiti bassit a mula. Mangiraman ti pamilia kadagiti 13 a sebbangan kadagiti tallo a henero a patneng iti Indomalaya. Ti Crypteroniaceae ket patneng kadagiti tanap a tropikal ken submontane akatudu an a bakir. Ti henero ti Axinandra ket mangiraman kadagiti uppat a sebbangan, maysa iti Sri Lanka (A. zeylanica) ken dagiti dadduma iti Borneo ken ti Peninsula Malayo. Ti Crypteronia ket mangiraman kadagiti pito a sebbangan, a sumakup manipud iti akindaya nga India aginggana iti Abagatan a daya nga Asia ken akin-abagatan a Tsina aginggana iti Peninsula Malayo, Indonesia, ken Baro a Guinea. Ti Dactylocladus ket aglaon iti bugbugtong a sebbangan, a patneng kadagiti bakir ti tanap a kalugnakan ti Borneo. Kadagiti morpolohiko a panagusig a sinuportaran babaen ti kaudian a panagusig iti kloroplasto a DNA, ket mangikeddeng a ti Crypteroniaceae ket asideg a kabagian dagiti uppat a bassit a myrtaleano a pamilia, ti Penaeaceae, Oliniaceae, ken Rhynchocalycaceae iti akin-abagatan nga Aprika, ken ti Alzateaceae iti Tengnga ken Abagatan nga Amerika. Ti sapasap a tinaudan dagitoy a lima a pamilia ket naipagpagarup a nagtaud iti akinlaud a Gondwana idi las-ud ti panawen ti Kretasio, ken naawit nga agpaamianan ti Crypteroniaceae iti India kalpasan ti panagsisina ti akin-abagatan a superkontinente, a naggigiddiat kadagiti tallo a henero sakbay iti panagdinnungpar ti India iti Asia. Kanungpal a naiwarwaras dagiti henero manipud iti India aginggana kadagiti nadam-eg a tropikal a bakir iti Abagatan a daya nga Asia.